شباب ود العباس
السلام علبكم ورحمة الله

منتدي شباب ودالعباس يرحب بكم ويتمنا لكم سياحة ممتعة
بين مواضيعه

شباب ود العباس

ودالعباس الاصاله
 
الرئيسيةاليوميةبحـثالأعضاءالتسجيلدخول

شاطر | 
 

 هموم المغتربين

اذهب الى الأسفل 
كاتب الموضوعرسالة
فيصل عبدالرحيم النور
الوسيط
avatar

عدد المساهمات : 64
تاريخ التسجيل : 25/02/2010

مُساهمةموضوع: هموم المغتربين   الخميس فبراير 10, 2011 11:28 pm




غايتو نحن المغتربين او زي ما بقولو علينا في السودان المختربين مغستنا تشرط عديييييل كده.. ووجعتنا مافي زول بحس بيها غيرنا براااانا والشكية بس لله ..تبدأ الحكاية بفكرة مشؤؤمة تبدأ تراودك من الجامعة واول ما تبدأ تحب زميلتك في سنة اولي وتفضل سنة مقطع في مصارينك وتستجمع شجاعتك وتلمح ليها في سنة تانية وتبدا صاحبتنا تلقط سنارتك في سنة تالتة وتبادلك الاحساس وتعيش اجمل ايام عمرك في سنة رابعة وتشيلك الهاشمية وتقرر تغترب بأسرع فرصة عشان ترجع بعد سنتين وتعرس حبيبتك وتفضل شايف الدنيا كلها حلوة ومزهزهة قدام عيونك وتتخيل خطتك حا تمشي زي ما عايز, تعرس الجو المكسر ضلعك ده وتبنو عشة سعيدة وتجيبو اولاد وبنات وتفضلو تتغزلو في بعض العمر كلو ..وفعلا تركب الطيارة التعيسة وتحط الرحال في أي دولة خليجية ما بفرق الاسم كتير كلهم زي بعض قطر السعودية الامارات كلوووووو صابون.

المهم تبدأ الدوام بعد معافرة.. وتقبض اول راتب.. وتستلم اول جواب.. وتحول اول حوالة.. وتتلقي اول ضربة شاكوشية علي راسك لما تعرف انو حبيبتك عرست بعد سفرك وبرضو عرست مغترب بس جاهز من خمستاشر سنة قاعد يكد ويكدح وعمل ليها حفلة كاربة.. وشيلة رهيبة.. وشهر عسل ماحصل ووووو وتقعد انت تبكي وتتحسر وما تخلي شريط لهاشم ميرغني ما تستلفو وتنسخو وتحضن المسجل الليل كلو وتبكي وبي كده تكون خسرت اول هدف في حياتك ..وتتوالي الخسائر وتلف السنين وانت ما عملت أي حاجة غير ربيت كرش وعملت صلعة وكل سنة تنزل السودان نفس الموال : الهدايا للاهل.. والجيران ..والحبان.. الملايات.. التياب.. الستائر.. الساعات.. الريحة..و فلان عايز شيلة.. علان داير دواء.. فرتكان داير تلاجة..شيطان داير تلفزيون ملون.. امك وابوك ماشين الحج رسل..البيت عايز تصليح حول.. ودعمك مقبوض في شيك ومسجون رسل ..بت خالتك اليتيمة دايرين يعرسوها حول ..اخوك الصغير مسافر يقرأ الجامعة رسل..رمضان علي الابواب حول..ما تنسي خروف العيد رسل..المدارس قربت تفتح حول..المرقة اتعدمت اشحن..اللبن اختفي من السوق اشحن..المطر كسر البيت حول..جدك مات والبكا للحول رسل.. وتقضي حياتك بين رسل وحول واشحن واشحن وحول ورسل وهكذا دواليك ...وفي نص المعمعة دي تطلع ليك الوالدة لازم تعرس وانت تائه بين شاكوشك القديم واختيارك الجديد وفي النهاية حتي اهم قرار في حياتك تتركه لاهلك ويحددوه ليك شريكة حياتك وعشان تسافر وتكمل باقي المشوار لازم تجر ليك سلفية كاربة لانك طبعا طول السنين دي ما وفرت ولا تعريفة المهم تأخد السلفية وتتكسي وتكسي العروس والاهل والحبان القاعد تكسي فيهم من سافرت يعني مافي شي اتغير غير المقاسات المهم العروس تطلب ود الامين وانت تقول حاضر.. عايزة قسمة ترقصها حاضر.. عايزة تسافر شهر العسل اثينا حاضر برضو ..المهم يتم زواج الندم والسجم وعشان تجيب العروس لازم ترقع السلفية تاني وتفرش الشقة وتصلح العربية و المكيف لزوم الحوامة والفرجة علي البلد ..المهم يمر عليك العام وانت شايل ولدك او بتك والفرحة غامراك للطيش وجية جناك بردت عليك الفلس والقرف وقبلما تشبع منو تفاجاك زوجتك المصون بخبر الحمل التاني والتالت والرابع وتنقد فيك ولادة وتتوه انت بين جحيم الشغل وازعاج البيت وطلبات السودان وترقيع السلفيات وسنة وراء سنة وراء سنة تلقي ابنك علي ابواب الجامعة وبعد الدروس الخصوصية والمصاريف في المدارس الخاصة ووووو تفرح بالنتيجة الحلوة بتاعت ولدك وتسترجع ذكريات فرحتك بي قدوموا وقبلما ما الفرحة تتم تتفاجا بعدم قبولو في أي جامعة حكومية وتسوء حالة ولدك النفسية وانت تتقطع عشانو وتسوقو وتمشي بيهو السودان بعد ترقع السلفية طبعا وتدخله الكلية العايزها وتجبر بخاطره وانت تائه ما لاقي البجبر خاطرك ولا يطبطب عليك تتقاذفك الايام وتتوسد الهموم وتحيط بك امراض الشيخوخة من كل حدب وصوب المهم بعد تطمئن علي ولدك وتدفع كل الضرائب والجبايات والنفايات والتفاهات تسلم الولد لاخوك الإنت قريته في الهند وعرست ليهو وساكن في بيت ناس ابوك الانت صلحتوا بدم قلبك وتتفاجا انو بتهرب منك وما عايز يمسكو وبديك نصيحة انك مفروض بعد كدة ترجع نهائي وتستقر..تجرجر ازيال خيبتك وتمشي لاختك الكبيرة عشان تشكي ليها ليس الإ وتفهمك غلط وتبادرك انو راجلها ما حايقبل يمسك ولد مع بناتو الفتوات ديل وتطلع من عندها العبرة خانقاك وتعرج علي ود عمك بتاع الشيكات الطايرة الطلعته مية مرة من السجن بعد ما طلع قروشه السارقها وبني بيت من 3 طوابق وربا ليهو دقن وشال ليهو سبحة وصدق انو شريف مكة وقعد ينصح فيك الولد في عمر مراهقة والبلد مليانة مخدرات وعصابات وووووو المفروض انت كان تعمل حساب اليوم ده وتبني ليك بيت عشان علي الاقل الاولاد ديل يرجع و مع امهم وبعد درس الوعظ ده تطلع وانت بتتقطع من ظلم ذوي القربي الاكلوك لحم ورموك عظم..بتبكي علي الناس العزيتهم ورزيتهم وما عزوك ..منهار نفسيا علي الهبل بتاعك والغباء العشت فيهو السنين دي كلها ...واول قرار تأخدو تلم شنطتك وشنطة ولدك وترجع لي الغربة وتكتشف بعد سنيييييييييييين طويلة انو الغربة ارحم من اهلك وترقع السلفية وتقرر تسفر ولدك أي بلد وتستوعب الدرس بعد حقك راح وعرضك فاح.

منقول






الرجوع الى أعلى الصفحة اذهب الى الأسفل
 
هموم المغتربين
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
شباب ود العباس :: المنتدي الثقافي-
انتقل الى: